|
حنّا بنات الوطـن وشمـوع ديجـوره وحناّ بنات الوطـن وأحلـى سعوديـه
|
منابت المجد وأصل المجد والصـوره مرابـط العـز وسبـوق النـداويـه
|
منابت الملح وأصل الـورد وزهـوره مكاسـر العـود والنفحـه سمـاويـه
|
عذبات الانفاس وأغلى المسك وعطوره نفحات الاشجـان والنسمـه ربيعيـه
|
فوح الخزامى بروض ٍ قيل ممطـوره قدِ علّها مـع بكـور الوسـم وسميـه
|
حنّا بنات الوطـن سكنـاه وخـدوره حنّا بنـات الوطـن والثقـل ماريّـه
|
ياللـي تعذربنـا يمنـاك مكـسـوره ماكـن فينـا لـك أم وبنـت وأخيـه
|
أفكـارك السـود مشبوهـه ومبتـوره وعلومـك العـوج ملفوفـه وملـويـه
|
تلـف وإلا تزيـد اللـف لــك دوره العلـم بالهـون والحاجـات مقضيـه
|
خذها على نور والرايـات منشـوره بالعـدل والميـز مكتوبـه ومقـريـه
|
خذها وباقـي بهـا وقفـات مذخـوره تجيك مـن فـوق وإن حبيّـت رديـه
|
بنت الوطن ياضعيف الرأي مذكـوره بالخيـر والطيـب مذكـوره سنافيـه
|
من أول الوقـت يالمسكيـن مشهـوره بالفكر وأحلـى التواصيـف النسائيـه
|
بنت الوطن ياقصير الشوف معمـوره بالعطـف والليـن وتزيـده بحنـيـه
|
إن كان بالكون قالوا عينـه وحـوره بنت الوطن من عظيم الشان حوريـه
|
بنت الوطن من جمال الخلق مستـوره الطبع هـادي ووقـت الجـد جديّـه
|
ممكن تقـوّم بوجـه المعتـدي ثـوره والأصـل تكوينهـا ثابـت حيـاويـه
|
شيهانة اللحظ بنـت الريـح منثـوره ملمومة الخصر بنـت الذيـب ريميـه
|
يعنـي حجازيـة العينيـن مخبـوره نجديـة الخصـر واللمحـه خليجيـه
|
ريحانة الفل بـأرض الفـل مبـذوره يعني عسير وعبير أحلـى عسيريـه
|
وقـاّدة الحـس بالاشـواق دكتـوره يضيق صدر الزمـن تبقـى شماليـه
|
تكتب حروف الوفا وتسّـن دستـوره بحروفها إخلاص وإن حبّـت هواويـه
|
يعني هي الجو مـع بيـداك وبحـوره من رأسهـا للقـدم بالزيـن مكسيـه
|
سمعت ياللي حسبتـه لعبـة الكـوره بعض السواليـف لا سقتـه عماويـه
|
لا ضيّع الدرب مثلك وأخلف شعـوره ندلّـه الـدرب والاعـمـال بالنـيـه
|
ياخـاوي الفكـر والعـدلات مقبـوره في صدرك اللي لبس بلـواه صدريـه
|
مغرور مغرور مثلك نـاس مغـروره بمركـب النقـص والاوهـام مبليـه
|
منادميـن الخطـا ملفـاه وطـيـوره الفكـر خيـاّل والسـاحـه خيالـيـه
|
من الحماقه لبسـك الكبـر وشـروره والحمق رمح الردى وحـدود هنديـه
|
تسكن زواياك والطرقـات مهجـوره ياغراب خل الحمام إنسـى خطاويـه
|
لو تفرد الريش يالطـاووس مأثـوره عواقـب الكبـر يالمغـرور سلبـيـه
|
ياسيّـد الغطرسـه ياقاصـر شبـوره ياعاشق الذات عشـق الـذات نفسيـه
|
سمعت رد الاصيلـه وإفهـم سطـوره بسيـط منسـاب والاوزان شعبـيـه
|
وإسلك طريق الهدايه وإحفظ السـوره السوره اللـي علـى المعنـى ومكيـه
|
وإن كان نفسك على الشينات مجبـوره والنـار ياميّـت النيـران مطفـيـه
|
أجيك أنا بنـت هالديـره ومأجـوره وتشوف بنت الوطن والجمـره الحيـه
|
أجيك وتشوف بنت السبـع مسعـوره وأخرك معروف والدعـوى طبيعيـه
|
الوقت معروف فـي زنـات دبـوره يخرّب العـش وهـو العـش راعيّـه
|
ماهي بشرَبه من الغـوري وشابـوره بعض الحكاوي وفيـه حـدود محميـه
|
خذها ولا أقـول لا رديّـت مشكـوره من واجبي لا دفعـت الشـر والسيّـه
|
بأول خطوط الدفـاع وراس طابـوره أصــد وأرد والـصـدّه هجومـيـه
|
خذها وأنا بنت قوم المجد وحضـوره مني وأنا مـن بنـات الـدار نجديـه
|
من نجد ماجيت أنا المغرب وناطـوره وماجيت حد اليمن ما كنـت مصريـه
|
خذها وأنا ماعرف الحمراء ولا شتوره ولا جيت عمـاّن وإلا كنـت شاميـه
|
ولا نيب من بابل النهريـن وآشـوره وإلا بعد من بنـات الشـرق شرقيـه
|
خذها وأنا من عظيم الشان منصـوره من نجد ماقول أنـا شقـراء وغربيـه
|
أعيّد العيـد مـا عوشـر بعاشـوره الديـن الاسـلام والمنهـاج سنـيـه
|
خذها ونفسي على المسفـار مأمـوره والنفـس معـروف مأمـوره ومنهيـه
|
ماقلتها من غضب بالوقـت مقهـوره على الملا وإن بغيـت السلـم سلميـه
|
خذها وأنا بنت روس الطيب وصقوره الجـد قحطـان والمنشـأ قصيمـيـه
|
|
اليوم في 21:25 من طرف 
